2025-жылдын 23-октябрында Майлуу-Суу шаарынын прокурору Назарбеков Асылбек Назарбекович менен Борбордук Азия колледжинин студенттеринин жолугушуусу болуп өттү. Иш-чарага колледждин 1–2-курсундагы «Укук таануу» адистигинде билим алып жаткан 83 студент катышты. Жолугушуунун негизги максаты — студенттердин укуктук маданиятын жогорулатуу, жаштар арасында мыйзам бузуулардын жана коомдук кооптуу көрүнүштөрдүн алдын алуу болуп саналат.
Коррупцияга каршы күрөш — ар бир жарандын жоопкерчилиги
Жолугушуу учурунда прокурор Асылбек Назарбекович студенттерге коррупциянын коомго келтирген зыяндары, анын мамлекеттин өнүгүшүнө тийгизген терс таасирлери жана ар бир жарандын бул көрүнүшкө каршы туруудагы жеке жоопкерчилиги тууралуу кеңири түшүндүрмө берди. Ал коррупциянын тамырына каршы күрөшүү билим берүү мекемелеринен башталаарын белгилеп, жаштарды адилеттүүлүк, тазалык жана ак ниеттик принциптерин карманууга чакырды. Ошондой эле, Кыргыз Республикасынын 2025–2030-жылдарга карата кабыл алынган Мамлекеттик стратегиянын негизги багыттары тууралуу да маалымат берип, студенттерди активдүү жарандык позицияны карманууга үндөдү.
Тыюу салынган дары-дармектерден алыс болуу — жашоонун баалуулугу
Мындан тышкары, жолугушууда учурдагы актуалдуу маселелердин бири болгон жаштар арасында тыюу салынган дары-дармектерди колдонуу темасы да талкууланды. Прокурор жаштарга мындай заттардын адамдын ден соолугуна, психологиялык абалына жана жашоосуна тийгизген оор кесепеттери тууралуу мисалдар менен түшүндүрүп өттү. Ал соңку жылдары өлкө аймагында айрым жаштардын тыюу салынган заттарды колдонуп, өз өмүрүнө кол салган учурлар көбөйүп жатканын белгиледи.
Жолугушуунун жүрүшү жандуу мүнөздө өтүп, студенттер суроолорун берип, өз пикирлерин ортого салышты. Иш-чаранын соңунда катышуучулар мындай жолугушуулар жаштардын укуктук аң-сезимин жогорулатууда жана коомдук жоопкерчиликти калыптандырууда чоң мааниге ээ экенин белгилешти.
