Кыргыз Республикасынын ички иштер министри, милициянын генерал-лейтенанты Ниязов Улан Омокановичтин демилгеси, ошондой эле 2022–2028-жылдарга карата Кыргыз Республикасында укук бузуулардын алдын алуу концепциясы жана 2023-жылдын 4-декабрында кабыл алынган Улуттук иш-чаралар планынын алкагында өлкөбүздүн бардык облустарында, райондорунда жана шаарларында «Жаңы муун – жаркын келечек, таза муун – коопсуз келечек» аттуу форумдар өтүп жатат.
Ушул демилгени колдоо жана аны ишке ашыруу максатында Майлуу-Суу шаарынын ички иштер бөлүмү 2025-жылдын 18-апрелинде Майлуу-Суу шаарынын маданият үйүндө форум өткөрдү.
Иш-чарага Майлуу-Суу шаарындагы мектептердин жетекчилиги, окутуучулары, колледждердин студенттери жана жаш активисттер катышып, жалпысынан 500гө жакын адам чогулду.
Форумга Борбордук Азия колледжинин директору А.Т. Агабеков, администрация мүчөлөрү жана 100гө жакын студент катышышты. Конференциянын жүрүшүндө колледждин директору А.Т. Агабеков сөз сүйлөп, жаштарды кылмыштуулуктан, укук бузуулардан жана зордук-зомбулуктан алыс болууга чакырды.
Конференциянын алкагында колледждин студенттери жаштар арасындагы кылмыштуулуктун себептери жана кесепеттери боюнча атайын сценка көрсөтүштү. Мындан тышкары, флешмоб уюштурулуп, катышуучуларга таасирдүү чакырыктар айтылды.
Иш-чаранын соңунда активдүү катышкан студенттерге жана уюштуруучуларга ички иштер бөлүмүнүн жетекчилиги тарабынан ыраазычылык билдирилип, сыйлыктар тапшырылды. Форум жаштарды укуктук маданиятка үндөөдө, жоопкерчиликтүү болууга, өз ара сый-урмат мамиле түзүүгө чакырууда маанилүү кадамдардын бири болуп калды.
