2025-жылдын 18-мартынан 20-мартына чейин Борбордук Азия колледжинин студенттери арасында “Мен Манастын урпагымын” аттуу жаш манасчылар сынагы болуп өттү. Бул сынак Кыргыз Республикасынын Президентинин “Кыргыз элинин баа жеткис руханий мурасы – «Манас» эпосунун үчилтигин («Манас», «Семетей», «Сейтек») ар тараптан изилдөө жана популярдаштыруу” боюнча кошумча чаралар жөнүндөгү Жарлыгынын жана Кыргыз Республикасынын Билим берүү жана илим министрлигинин 2025-жылдын 11-январындагы №23-3/61 тапшырма катынын негизинде уюштурулду.
Кароо-сынакка жалпы он сегиз команда катышты. Сынактын калыстары болуп Майлуу-Суу шаарындагы мектептердин кыргыз тили жана адабияты сабагынын мугалимдери чакырылды. Сынактын жүрүшүндө студенттер мыкты даярдыктарын көрсөтүшүп, «Манас» эпосун Сагымбай Орозбаковдун варианты боюнча айтып беришти.
Сынактын жыйынтыгында эң мыкты көрсөткүчтү көрсөтүп, биринчи орунду биринчи курстун 11-ПНК тайпасынын студенттеринен түзүлгөн “Манас Руху” командасы ээледи. Экинчи орунду биринчи курстун 11-КС тайпасынын студенттеринен түзүлгөн “Жаш Айдар” командасы ээледи. Ал эми үчүнчү орунду үчүнчү курстун 31-БД тайпасынын студенттеринен түзүлгөн “Бакай” командасы ээледи.
Жеңүүчүлөргө окуу жайдын администрациясы тарабынан дипломдор жана белектер тапшырылды.
